بارود کی بُو میں محبت کی خوشبو پھیلانے والا۔۔۔۔۔۔۔۔۔۔۔۔ آزاد حسین آزاد

آزاد حسین آزاد کے نام سے ادبی دنیا میں شہرت پانے والے خوب صورت لب و لہجے اور منفرد انداز کے نوجوان شاعر  اکتوبر 1980 کو منڈی بہاؤالدین میں پیدا ہوئے ۔کراچی یونیورسٹی سے اردو میں ایم اے کیا اور آج کل پاکستان کی مسلح افواج میں ملازمت کے فرائض انجام دے رہے ہیں۔ مسلح افواج میں ملازمت کے سبب ادبی سرگرمیاں محدود ہیں۔ مگر ان کا ادبی سفر بہت عمدگی سے رواں دواں ہے۔ اب تک ان کی شاعری کے دو مجموعے  ”کوئی بات ہے جو اداس ہو“  اور  ”مرے سب لفظ تیرے ہیں“  منظر عام پر آ چکے ہیں۔ پہلا مجموعہ 2003 دوسرا مجموعہ 2012 میں شائع ہوا۔ اس کے علاوہ ملک کے مختلف ادبی رسالوں اور اخبارات میں ان کا کلام شائع ہوتا رہا ہے۔ پہلی غزل جنگ سنڈے میگزین میں ۱۹۹۷ میں شائع ہوئی ۔آئیے ان کی خوب صورت شاعری سے لطف اندوز ہوتے ہیں۔

کیسے کیسے ابھی بھوگنے بھوگ ہیں 

ہم کہانی سے بھاگے ہوئے لوگ ہیں 

دودھیا چادریں صاف ہوں یا نہ ہوں

ان سے بڑھ کے بھی بیوہ کے کچھ روگ ہیں 

ہم سے شیریں سخن کا گماں جھوٹ ہے 

ہم مشینوں سے گزرے ہوئے پھوگ ہیں 

باس، آفس، ٹریفک، رکی فائلیں 

ہجر سے، وصل سے، کچھ الگ جوگ ہیں

ان کی پرواز مشروط ہے جذب سے

یہ کبوتر کہاں طالبِ چوگ ہیں

ناشنیدہ اساطیر کے شہنشاہ 

کچھ معافی کہ ہم بے گنہ لوگ ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اک مسافر کو رہے جیسے دروبام کی بھوک 

تھی مرے نام کو کچھ ایسی ترے نام کی بھوک

تھوڑی تفریق سے دونوں کی طلب ایک ہی تھی

مجھے جذبات کی تھی اور اسے اجسام کی بھوک

ڈھلتی عمروں کی وہ یک طرفہ محبت ہائے

میٹھی میٹھی  سی کسک جیسے سرِ شام کی بھوک 

استخارہ کوئی درویش اگر کر پائے 

میں ہوں خاموش طبیعت اسے کہرام کی بھوک 

ورنہ پرواز میں کوتاہی بھی ہے جرمِ عظیم 

کھینچ لائی ہے پرندوں کو ترے دام کی بھوک

سنگ برسیں تو لہو رنگ انا ہوجائے 

ان کےکوچے سے مٹے ہائے یہ دشنام کی بھوک 

کم پڑا آنکھ کے پیاسوں کو سمندر سید

سارا مے خانہ پیا اتری نہ دو جام کی بھوک

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نیند پرندے آنکھ سے کب مانوس ہوئے

 ہم ہیں اتنا جاگے " شب مانوس" ہوئے

ایک نئی ہجرت کا حکم ملا پھر سے

کچھ پنچھی منڈیر سے جب مانوس ہوئے

کھلتے کھلتے سارے راز کھلے ہم پر 

ہوتے ہوتے ہم بھی "چھب مانوس" ہوئے 

ویرانوں سے قربت میں اک عمر لگی

دشت میں رہتے رہتے اب مانوس ہوئے

اک دوجے کو پہچانا ان  آنکھوں نے

ان ہونٹوں سے میرے لب مانوس ہوئے

ہم نے غزل میں سادہ لہجہ اپنایا 

اس لہجے سے سارے اب مانوس ہوئے 

 عشق سے ہم نے اپنے آپ کو پہچانا

اور اس عشق سے ہی ہم" رب مانوس" ہوئے 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آ بیٹھ تجھ کو اتاروں گا میں عطارد پر 

تری حیات سنواروں گا میں عطارد پر 

عدو کی شکل میں ہے ایلین سے جنگ مری

مریخ کھینچ کے ماروں گا میں عطارد پر 

ملے جو ساتھ ترا اے خلائی  شہزادی 

تمام عمر گزاروں گا میں عطارد پر 

 تمہاری شکل کے روبوٹ میں بناؤں گا 

پھر ان پہ عشق اتاروں گا میں عطارد پر 

عجیب طرز کی شکلوں سے واسطہ ہوگا

عجیب نام پکاروں گا میں عطارد پر 

تمہارے جسم کے خلیے کشید ہوں گے وہاں 

زمیں کے نقش ابھاروں گا میں عطارد پر 

میں سخت دھات کے پودوں پہ پھول ٹانکوں گا

خزاں کو پھر سے بہاروں گا میں عطارد پر 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گلوں سے بات بھی کب عطر بیز کرتا ہے 

غرور اتنا کہ خود سے گریز کرتا ہے 

تری گلی سے گزرنا محال ہو گیا ہے 

تمام شہر مرے ایکسریز کرتا ہے 

فلک بھی پھر تو مجھے چار کوس دکھتا ہے

وہ مین روڈ پہ جب کار تیز کرتا ہے 

ہے عشق یوں بھی تو حرکت کا تیسرا قانون 

وہ اور بھاتا ہے جتنا گریز کرتا ہے 

تمہارا حسن مری جان حسن ہے مانا

مگر جو کام تمہارا جہیز کرتا ہے 

گھڑے میں ڈال کے پتیاں گلاب کی سید 

وہ میری پیاس کو کچھ اور تیز کرتا ہے 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ روشنی رکھی تھی پسِ ذات بٹ گئی

صد شکر ہے خدا کا چلو رات کٹ گئی 

اب لوٹ آ کہ محو ہوئے جا رہے ہیں نقش

دیوار پر لگی ہوئی تصویر پھٹ گئی

 تھی جوس کے گلاس کی مانند زندگی 

آنے لگا جو ذائقہ کم بخت کٹ گئی

ہونگے ازل سے تابہ ابد خوار اہلِ شوق

یعنی جبینِ ناز سے تاحشر لٹ گئی 

کرگس نے جشن ِمرگ منایا درونِ دشت 

لیکن وہ بھینس دھاڑتے شیروں میں بٹ گئی 

دیواریں چومتی ہیں جبیں بار بار کیوں 

تاریکیاں بڑھی ہیں کہ بینائی گھٹ گئی 

بس بو تراب میں نے کہا معجزہ ہوا

اور ہر فصیلِ خیبری رستے سے ہٹ گئی

تھا احترامِ عہد کہ تکریم سلف کی

اک تشنگی فرات کے آگے تھی ڈٹ گئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اپنا لیا ہے فقر کو سب شان پھینک کر 

یعنی کہ پھول رکھ لیےگلدان پھینک کر

ململ دکھا رہا تھا میں لینن کی آڑ میں 

وہ اٹھ گئ دکان سے سب تھان پھینک کر

پانی کو احتیاط سے برتو خریف ہے

گندم نہیں اگے گی یہاں دھان پھینک کر 

جب داستان ختم ہوئی لوگ اٹھ گئے 

بیٹھا رہا میں آگ پہ لوبان  پھینک کر

پھر ساری عمر پھول اٹھانے میں لگ گئ 

گزرا تھا کوئی باغ سے مسکان پھینک کر

 اس درجہ تیری یاد میں بیگانہ ہوگیا 

کاغذ چبانے لگ گیا میں پان پھینک کر 

اک سمت زر رکھی تھی کھڑا ایک سمت میں 

اس نے عدو کو چن لیا دیوان پھینک کر 

وہ سر مئی کبوتری جو چھت کی شان تھی 

کل شب اتار لی گئی مرجان پھینک کر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ڈھونڈا کیے زمین پہ، افلاک تک گئ 

تجھ کو صدا تلاشتی اعماق تک گئ

جب تک خبر ورود کی عشاق تک گئی 

آندھی فصیل پھاندتی چقماق تک گئی 

لکھا ہوا غلط، نہ قبولا تمام عمر

سو بار تیغِ جبر مری ناک تک گئی

خود رو درخت تھے سو اگے اپنے زور سے 

مٹی ہماری چل کے نہیں چاک تک گئی

پھر ریت سے کشید ہوئی صبح عہد نو

اک شعلگی جنون کی ادراک تک گئی

دیمک زدہ تھی سوچ، تخیل قدیم تھا

بوسیدگی خیال کی اوراق تک گئی

پہلے تو ذکرِ حسن و ادا دیر تک ہوا 

پھر بات اس کی روز کی خوراک تک گئی

کیا کچھ بدل دیا ہے موئے روزگار نے

آفس کی جلدیوں میں مری "واک " تک گئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نیندیں ترس گئیں ہیں تجھےخوابِ گم شدہ 

مستی تلاشتی ہے مئے ناب ِ گم شدہ 

ہے لگ چکی زبان کو سچ بولنے کی چاٹ 

سقراط ہوں میں لاؤ وہی قابِ گم شدہ 

عمرِ رواں سے پوچھو گیا بچپنا کہاں 

ڈھونڈو کتاب زیست کے ابوابِ گم شدہ

ناز و ادا و آتش و شعلہ تمام است

پیری کہاں سے لائے یہ اسباب گم شدہ 

نو واردانِ دشت کی صحبت بیزار کن

قدروں کی مانگ پھر وہی انسابِ گم شدہ

کس کو کہیں صعوبتیں ہم رہروانِ زیست 

اربابِ گوش ہی ہوئےاربابِ گم شدہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دار کش چل کھینچ رسہ ختم کر اب کھیل کو

منتظر ہے حشر میں کوئی ہمارے میل کو

تم نہیں تو خاک ہے میرا یہ حسن ِدیرپا 

بھاڑ میں جائے یہ غازہ آگ لا گے تیل کو

نرم مٹی ہوں اگا سکتا ہوں تازہ بیج بھی  

کب تلک دیوار پہ لٹکاؤں سوکھی بیل کو

یہ سنہرے پانیوں کی جھیل منزل تھی مری

کھینچ لے زنجیر یارا روک لے اب ریل کو

ختم ہوگی بامشقت قید میری آخرش

 توڑ دے گی روح اک دن گندمی سی جیل کو

بھر بھری دیوار جاں ہے دیکھیے کب گر پڑے 

روک پائے گی کہاں تک وقت کے یہ  سیل کو

جان دو پہلے تو پھر تم وصل کی بابت کہو

کس طرح میں پاس کردوں پیپروں میں فیل کو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجھ کو اگر زمیں پہ خدا دستیاب ہو

 سب رہروانِ شب کو دیا دستیاب ہو

پھر کینوس پہ پینٹ کروں حسن ِدیرپا 

خوشبو، گلاب، رنگ، گھٹا، دستیاب ہو

دل کے معاملات پہ کچھ مشورہ کریں 

تم کل ذرا سی دیر کو کیا دستیاب ہو؟ 

صدیوں سے منتظر ہے کوئی وصل ڈھونڈتا

دنیا کی ہے قدیم صدا، دستیاب ہو 

افکار پہ گھٹن کی فضا موت ہی تو ہے

زنداں میں ہم دیوں کے ہوا دستیاب ہو 

شہ رگ کی رفعتوں سے اتر سامنے بھی آ

چلمن ربوبیت کی ہٹا، دستیاب ہو

غالب کے میں خلاف نہیں ہوں مگر حضور 

اب شاعری میں کچھ تو نیا دستیاب ہو 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔