زندہ دلی اور جازبیت سے بھرپور ...... عین عمر

گجرات سے تعلق رکھنے والے نامور شاعر عین عمرکا شمار نہایت سنجیدہ شعراء میں ہوتا ہے ۔ کم عمری میں ہی اس کے اسلوب سے مشاہدہ،پختگی اور وسیع المعانی گفتگو جھلکتی ہے۔عین عمر کا کلا م محبت  بھرے جذبات ،زندہ دلی اور جازبیت سے بھرپور ہے۔

لمحات جن میں اس نے کہا ہاتھ دیجیئے

جینا نہ جانتے تھے جو ،  وہ لوگ بھی جیئے

گاؤں کی اک دکان پہ خوشیوں کے ڈھیر میں

اک غم پڑا تھا دل نے کہا یہ بھی لیجئے

مخلوقِ بے زبان کا وقتِ سکون ہے

دیمک زدہ کواڑ پہ دستک نہ دیجیئے

جیسا بھی ہم کریں یہی کہتے ہیں چارہ جو

جیسا بھی کیجیے مگر ایسا نہ کیجیے

پیتے ہیں غم کا جام نکلتے ہیں اشک , تب

حکمِ جناب ہوتا ہے ان کو بھی پیجیے

شہرِ ستمگراں ہے رفو سوئی مختصر

فکرِ قبا نہ کیجیے ہونٹوں کو سیجیے

ہجرِ جناب فرض ،  مقلد پہ قیس کے

پھر اس پہ یہ بھی شرط کہ وہ زندگی جیئے

۔۔۔۔۔۔۔۔۔۔۔۔۔۔۔

محبت پیش گھر گھر کر رها هوں

میں تقلیدِقلندر کر رها هوں

که دو گز کی عمارت کے لیے میں

اکٹھے اینٹ پتھر کر رها هوں

اداکاری اداکاروں کا فن هے

مگر ان سے میں بهتر کر رها هوں

میں اسکو چھوڑ کر اک داستاں میں

حساب اپنا برابر کر رها هوں

یقیناً کر چکی ہوگی زمیں بھی 

ستم جو جو زمیں پر کر رہا ہوں

۔۔۔۔۔۔۔۔۔۔۔۔۔۔۔۔۔۔۔۔۔

درد کو سامان ِراحت کر سکے

عشق ہی ایسی کرامت کر سکے

ہائے طوفاں ،ہائے طوفاں ، مت کرو

ریت کا حق ہے  کہ  ہجرت  کر سکے

اس لیے ہم نے محبت چھوڑ دی

اور بھی کوئی محبت کرسکے

دل ، سپاہ جسم کے سالار کا

حق نہیں بنتا بغاوت کرسکے

کاش اب دل عشق کرنا چھوڑ دے

اور پھر حسب ضرورت کرسکے

۔۔۔۔۔۔۔۔۔۔۔۔۔۔۔۔۔۔۔۔۔

عشقِ من تذلیل تک پهنچائیے

پایۂ تکمیل تک پهنچائیے

فیل والے کی نگہہ کعبه په هے

کنکری بابیل تک پهنچائیے

پانیوں کی زندگی خطرے میں هے

مچھلیوں کو جھیل تک پهنچائیے 

چشمِ نم میں کجلگی فرمائیے

طور کو اک نیل تک پهنچائیے

کوچهء جاناں کے هر اک سنگ کو

عین سنگ ِمیل تک پهنچائیے

۔۔۔۔۔۔۔۔۔۔۔۔۔۔۔۔

میری آنکھوں میں جو یہ لالی ہے

اس نے  تیری  جگہ  سنبھالی  ہے

ہم نے خوشوں میں وصل کی گندم

سات   برسوں    تلک    بچالی   ہے

آخری  چند   ایک   سالوں   سے 

سالی لفظوں کی قحط سالی ہے 

عقلمندی ، اے عقل کے دشمن

عشق والوں کی ایک گالی ہے 

اک تری یاد اک مرا دل  ہے

ایک گلشن ہے ایک مالی ہے

۔۔۔۔۔

سمندر میں یوں کنکر پھینکتے رہنے سے اے صاحب

جزیرہ دیکھنے کی آرزو پوری نہیں ہوتی

ترا نظریں چرا کے بات کرنا اچھا لگتا ہے

مگر ایسے ہماری گفتگو پوری نہیں ہوتی

بہاؤ خون کا لازم ہے تکمیلِ محبت میں

یہ وہ تطہیر ہے جو باوضو پوری نہیں ہوتی

۔۔۔۔۔۔۔۔۔۔۔۔۔۔۔۔

چلو چراغ کے نیچے کی روشنی کے لیے

ہر اک چراغ کے نیچے چراغ دفنائیں

۔۔۔۔۔۔۔۔۔۔۔۔۔۔۔۔۔۔۔

خالی زمین پر میں کسے یاد آ گیا

آدم کی پہلی چھینک پہ کچھ تبصرہ کرو

۔۔۔۔۔۔۔۔۔۔۔۔۔۔۔۔۔۔۔

جیت کا فیتا ایک قدم پر رہ جاتا ہے 

اور میں الٹی جانب دوڑنے لگ جاتا ہوں

۔۔۔۔۔۔۔۔۔۔۔۔۔۔۔۔۔۔۔۔۔

اکیلے نیند کب آتی ہے مجھ کو

بغل میں خواب تیرا لیٹتا ہے

۔۔۔۔۔۔۔۔۔۔۔۔۔۔۔۔۔۔۔۔۔

اس سے اندازہ لگا ہجر کی کڑواہٹوں کا

آخری خط ترا دیمک سے بھی کھایا نہ گیا

۔۔۔۔۔۔۔۔۔۔۔۔۔۔۔۔۔۔۔۔۔

یہ میرا اور کبوتروں کا مشترک اصول ہے

غروب آفتاب تک جو آگئے تو آگئے

۔۔۔۔۔۔۔۔۔۔۔۔۔۔۔۔۔۔۔۔

تمہاری آنکھ تو ویسے ہی جان لیوا ہے 

پھر اُس پہ اِس نے مدینہ بھی دیکھ رکھا ہے

سفر ہے موت کا رختِ سفر نہیں کچھ بھی

مگر جو لطف ترے شہر کے سفر کا ہے

اجل کا ذائقہ کیسا ہے پوچھئے ہم سے

بوقت ِ ہجرِ درِ یار ہم نے چکھا ہے

میں نعت سوچوں تو سُر آئے بائیں جانب سے

جو دائیں والا فرشتہ ہے نقل کرتا ہے

وہ حالِ عین سے واقف تو ہیں مگر پھر بھی

بتانا درد میں ہے روگ میں ہے تنہا ہے

۔۔۔۔۔۔۔۔۔۔۔۔۔۔۔۔۔۔۔