تازہ لہجے اور خوبصورت احساسات سے معمور ۔۔۔۔۔۔۔۔۔۔۔ آرب ہاشمی

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عشق میں سوچ کا رخ موڑ دیا جاتا ہے

اور دیوار سے سر پھوڑ دیا جاتا ہے

ہجر دے کر تو سبھی مار دیئے جاتے ہیں

ہائے وہ شخص جسے چھوڑ دیا جاتا ہے

ایک لمحے میں ہوئے قید زمانے کتنے

وقت سے وقت یہاں جوڑ دیا جاتا ہے

اب ذرا سیکھ لے خاموش تکلم کرنا

کاسہء حرف یہاں توڑ دیا جاتا ہے

عشق پھر اپنی پناہوں میں اسے رکھتا ہے

جس کو بے رحم و کرم چھوڑ دیا جاتا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کھل گیا بھید خسروی کے بعد

جھولی بھرتی ہے عاجزی کے بعد

آخری عشق جو کیا میں نے

عشق پہلا تھا آخری کے بعد

شام وہ سر پھری ملی مجھ کو

آج اک اور سر پھری کے بعد

پیار کے بعد پیار کر لینا

خود کشی ہے یہ خودکشی کے بعد

ہیں یہ ساون کی بارشیں کیسی

حبس ہوتا ہے تازگی کے بعد

اپنے لفظوں کو چھوڑ آیا ہوں

سانس لیتا ہوں زندگی کے بعد

تجھ کو آرؔب خدا سے مانگا ہے

بندگی کی ہے بندگی کے بعد

 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ کوئی چال چل رہے ہوں گے

اور ہم بھی سنبھل رہے ہوں گے

وقت انگڑائی لے رہا ہو گا

لوگ چہرے بدل رہے ہوں گے

سرخ انگار آنکھ ہے اس کی

خواب آنکھوں میں جل رہے ہوں گے

تو جہاں ڈگمگا رہا ہو گا

ہم ترے ساتھ چل رہے ہوں گے

زہر مجھ میں انڈیلنے والے

آستینوں میں پل رہے ہوں گے

درد چھلکے گا میرے لفظوں سے

آنسو تیرے نکل رہے ہوں گے

 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سفر اپنا مکمل کر رہا ہوں

میں ہجرت ہی مسلسل کر رہا ہوں

بڑا ہی وہ سیانا بن رہا ہے

اسے شعروں سے پاگل کر رہا ہوں

وہ دل ٹھہراؤ میں ہے جھیل جیسا

نگاہوں سے میں ہلچل کر رہا ہوں

پرندوں سے محبت ہو گئی ہے

نیا تعمیر جنگل کر رہا ہوں

مجھے دریا ہیں بھرنے پانیوں سے

سو خالی سارے بادل کر رہا ہوں

یزیدوں کی حکومت ہو گئی ہے

میں برپا کوئی کربل کر رہا ہوں

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایسے ہوتے ہیں سرِشام نمودار چراغ

جیسے ڈھلتے ہوئے سورج کے عزادار چراغ

ایک ہی آگ میں جلتے ہیں یہاں ہم دونوں

مرا کردار پتنگا ترا کردار چراغ

کربلا اور بھلا کس کو یہاں کہتے ہیں

نوکِ نیزہ پہ ہے سر اور سرِ دار چراغ

کب کہاں کیسے پرکھنا ہے کسی کو ہم نے

یوں بھی حالات سے رہتے ہیں خبردار چراغ

روشنی ڈھونڈھنے سب لوگ وہاں جاتے ہیں 

یعنی اِس پار اندھیرا ہے تو اُس پار چراغ

خود ہی آندھی کی عنایت پہ انھیں چھوڑ دیا

اس پہ پھر یہ بھی تماشہ ہے کہ بیکار چراغ

 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پہن کے اجلی سی پوشاک چلا جاتا ہے

کون یہ شخص تہہِ خاک چلا جاتا ہے

اب ہے پیچھے سے ترا ہجر صدائیں دیتا

آگے آگے مرا ادراک چلا جاتا ہے

اب تو وہ میری محبت کا بھی مقروض نہیں

جانے کس واسطے نمناک چلا جاتا ہے

سانپ ہی سانپ لپٹتے ہیں جہاں پیروں سے

ایسے رستوں پہ بھلا خاک چلا جاتا ہے؟؟

   ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دیارِ غیر میں کوئی تو آسرا نکلا

وہ اجنبی تھا مرے اپنے گاؤں کا نکلا

وگرنہ کون محبت یہاں نبھا پاتا

خدا کا شکر جدائی کا راستہ نکلا

میں سب کو راہ دکھاتے یہاں تلک آیا

پھر اپنے گھر کا پتہ پوچھتا ہوا نکلا

یہ میری آنکھ کیوں دھندلائی ہوئی رہتی ہے

بس ایک خواب ہی نکلا تھا اور کیا نکلا

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جنوں کے شوق میں یوں محوِ عاشقی نہ رہے

کہ میرے بس میں یہ میری ہی زندگی نہ رہے

لہو بھی اپنی رگوں کا چراغ میں ڈالو

ہوا جہاں بھی چلے گی یوں سر پھری نہ رہے

کمال فن میں نہ اتنا بھی دے مرے مالک

کہ میرے عشق کے لہجے میں عاجزی نہ رہے

یہ سوچ کر ہی تو میں جلد لوٹ آیا ہوں

تو انتظار کرے اور جاگتی نہ رہے

ترے لبوں میں وہ تاثیر چھپی ہے آرؔب

مرے لبوں پہ ذرا سی بھی تشنگی نہ رہے

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عشق قاتل یا مسیحا کبھی سوچا ہی نہیں

میں بھی ہوں تیرا شناسا کبھی سوچا ہی نہیں

یہی سوچا کہ مجھے بھول نہ جائے وہ بھی

وہ مجھے یاد کرے گا کبھی سوچا ہی نہیں

تو بچھڑ کر بھی مرے وہم و گماں پر حاوی

میں نے کتنا تجھے سوچا کبھی سوچا ہی نہیں

بعد تیرے میں سمٹتا گیا کیسے کیسے

کیسے کیسے ہوں میں بکھرا کبھی سوچا ہی نہیں

دوڑتا رہتا ہوں میں موت کی جانب لیکن

زندگی سے بھی ہوں بھاگا کبھی سوچا ہی نہیں

سرِ محفل بھی میں خاموش رہا ہوں آرؔب

حُسن بن جائے تماشہ کبھی سوچا ہی نہیں

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دل ہی دل ہو گئے دلدار مرے رستے میں

اب تو بِکتے ہیں خریدار مرے رستے میں

وقفے وقفے سے جو اک بھیڑ لگی رہتی ہے

منتظِر ہوتے ہیں سردار مرے رستے میں

اپنے سر پر جسے یہ لوگ سجائے رکھیں

پڑی رہتی ہے وہ دستار مرے رستے میں

ایک ہی جست میں تجھ تک میں پہنچ سکتا ہوں

تیرے گھر کی ہے جو دیوار مرے رستے میں

شہر سے دور کہیں دشت میں جانا چاہوں

لیکن آجاتا ہے بازار مرے رستے میں

جیسے یہ مجھ کو مسیحا ہوں سمجھتے آرب

پڑے رہتے ہیں یہ بیمار مرے رستے میں

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجھ کو گر چاہو اجنبی کرنا

بات یہ مجھ سے پھر کبھی کرنا

ہم نے سیکھا سراجِ تاباں سے

ہر اندھیرے میں روشنی کرنا

یوں نہ ہو خود سے ہاتھ دھو بیٹھو

ان سے بس بات سرسری کرنا

جان تم میں ہے اب تو میری بھی

تم کبھی بھی نہ خودکشی کرنا

میں سنبھالوں گا اس زمانے کو

تم نہ مشکل کوئی کھڑی کرنا

اپنی گر زندگی سے عاجز ہو

تم بسر میری زندگی کرنا

کیا یہ بس میرؔ کو ہی آتا ہے؟؟

اس کے لب کو یوں پنکھری کرنا

عمر تھوڑی ہے رہ گئی آرب

کام چھوڑو بس عاشقی کرنا

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کبھی تو خود کو کبھی سائبان بیچ دیا

وہ تیرا آخری جو تھا نشان بیچ دیا

حصولِ رزق نے اتنا کیا ذلیل اُسے

غریبِ شہر نے اپنا مکان بیچ دیا

اس ایک بوڑھی سی عورت کا مر گیا شوہر

کفن کے واسطے بیٹا جوان بیچ دیا

امیرِ شہر نے کیسا کمال کر ڈالا

زمیں بِکی نہیں تو آسمان بیچ دیا

کسی نے جھوٹ تھا بولا تو زر کمایا تھا

کسی نے زر کے لیئے ہی بیان بیچ دیا

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خود کو اب دربدر بھی کرنا ہے

تیرے دل میں تو گھر بھی کرنا ہے

زندگی ٹھہر جا ہے پیاس بہت

خشک ہونٹوں کو تر بھی کرنا ہے

رات گزری ترے خیالوں میں

اور اب دن بسر بھی کرنا ہے

آؤ لہروں میں ارتعاش کریں

پیدا مدّوجزر بھی کرنا ہے

پیار سے بولو گے اگر آربؔ

بات نے پھر اثر بھی کرنا ہے

  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔